Аивад уарзынц зæрдæйæ

Нæ районы Культурæйы артдзæстыты алкæцыйы дæр кусы драмон къорд. Хæдахуыр артисттæ сæ куыст зæрдиагдæрæй æмæ бæрнондæрæй кæм æххæст кæнынц, уыдонæн лæвæрд æрцыд Адæмон театры нæмттæ.

Ацы аз нæ бæстæйы президенты уынаффæмæ гæсгæ Театры аз кæй у, уый тыххæй радзурдзыстæм сæ иуы тыххæй.
Олгинскæ хъæздыг у культурон традицитæй. Театралон аивадимæ та баст у 1904 азæй абоны онг. Уæд профессионалон актер, ирон театры бындурæвæрджытæй иу – Тотраты Бесæ æрыгон лæппуты къордимæ сæвæрдта Брытъиаты Елбыздыхъойы пьесæтæ – «Худинаджы бæсты – мæлæт» æмæ «Уæрæседзау». Спектакльтæ равдыстой Карсанаты Газийы сарайы. Уæдæ фыццаг сылгоймаг-драматург дæр ольгинскæйаг уыд – Кочысаты Розæ. Ныффыста дыууæак- тон комеди «Гæды лæг, кæнæ нæ пъырыстыф сæрра». Сарæзта сылгоймæгты драмон къорд æмæ сцæттæ кодтой спектакль, нæлгоймаджы ролты дæр хъазыдысты сæхæдæг.
Афтæ Олгинскæйы фæзынд театр. Фæстæдæр йæ архайджытæ систы Дзлиаты Соня, Тыбылаты Чермен, Дзгойты Бекзæ, Зыгъуытаты Сослан, Булацаты Валя, Рæмонаты Оля, Тотраты Георгий, Дзгойты Хадзымурат, Дзгойты Рая, Тебиаты Аслæнбег, æрчъегкаты Рая. Уыдон сценæйыл сæхи тынг дæсныйæ кæй æвдыстой, уый руаджы театрæн лæвæрд æрцыд 1960-æм азы адæмоны ном. 1984-æм азы къорды адæ- мон театры ном хъуыдис ногæй бахъахъхъæнын. Уыцы рæстæг ын разамынд лæвæрдта Теместы Умар. Уый хæдахуыр артистты ног фæлтæримæ сæвæрдта цалдæр спектаклы. Афтæ фæстæмæ Олгинскæйы театр ссис адæмон. Театры равзæрдæй абоны онг цæрджытæй сценæйыл сæ арæхстдзинад равдыстой 250 адæймагæй фылдæр. Сæ арæхстджын дæсныдзинадимæ базонгæ сты Ирыстоны иннæ хъæуты театруарзджытæ дæр.
Ног цардарæзт куы райдыдта, уæд зындзинæдтæ æвзæрстой Культурæйы артдзæстытæ дæр. Уыдонимæ – Олгинскæйы клуб дæр. Куыст цыд къуылымпытимæ, сæ режиссер дæр ацыд. Фæстæдæр Культурæйы хæдзары директор Алыккаты Ларисæ ирон драмон театры артисткæ Бæцæзаты Индирæйымæ баныхас кодта, æмæ та театр ногæй базмæлыд. Хæрз цыбыр рæстæгмæ хæдахуыр артисттæ Суджаты Тамилæ, Мамыхъаты Фатимæ, Кочысаты Сослан, Дзулаты Зæринæ æмæ Алыккаты Ларисæйæн йæхийымæ бацæттæ кодтой Айларты Асæхмæты комедии «Ханты цагъд». Режиссер сæ алкæйымæ дæр базыдта кусын æмæ спектакль рауад зæрдæмæдзæугæ. Уымæн та æвдисæн уыд театрдзауты размæ йæ куы рахастой, уæд сæ дæргъвæтин къухæмдзæгъд.
Уæдæ фарон адæмон театрты æркасты къамисы уæнгтæ стыр аргъ кæй скодтой Олгинскæйы хæдахуыр артистты архайдæн, сæ режиссер Бæцæзаты Индирæйы куыстæн, ууыл дзурæг у адæмон театры ном бахъахъхъæныны тыххæй сын зæрдиаг арфæтæ кæй фæкодтой, уый дæр.
Культурæйы хæдзары директор Алыккаты Ларисæйы куы афарстон, ацы аз Театры аз у æмæ уæ размæ цы хæстæ, цы нысантæ æвæрут, зæгъгæ, уæд мын радзырдта: — Мартъийы 27-æм бон уыдзæн Театры бон. Уыцы бæрæгбонмæ нæхи цæттæ кæнæм, спектакльтæй равдисдзыстæм скъуыддзæгтæ. Уымæй дарддæр нæ режиссер Бæцæзаты Индирæ – ирон театры артисткæ æвæры ног спектакль – «Хъæздыг хæдзар». Ныртæккæ уал ахуыр кæнæм нæ тексттæ. Залы уазал у, кæд уæдмæ фæхъарм уаид, æмæ уæд сценæйыл репетицитæ кæнын райдайдзыстæм. Нæ театралон къордыл ма бафтыд ног адæймæгтæ. Уыдон сты Тебиаты Батрадз – скъолайы директор, Токаты Тотрадз – кувæг лæг, Къориаты Зитæ – хъæуы бынæттон администрацийы кусæг, Хохаты Аслан – 10-æм къласы ахуырдзау.
Ацы аз нæ театрæн у юбилейон аз. æххæст ыл кæны 115 азы, æмæ бацæттæ кæндзыстæм сфæлдыстадон изæр. Равдисдзыстæм дзы спектакльтæй скъуыддзæгтæ.
– Тыхстдзинæдтæ дæр æййафут?
- æнæмæнг. Зымæг хъар- мгæнæнтæ кæй нæ кусынц, уый нæ тынг батыхсын кæны. Залы у уазал, сценæйыл нæ вæййы архайæн. Нæй нæм декорацитæ дæр æмæ тыхамæлттæ кæнæм уыдоны тыххæй дæр.
Театры аз уын ахæм пайда фæуæд, цæмæй уæ куыст фæрогдæр уа, уæ размæ ‘вæрд нысантæ скæнын та уæ къухы бафтæнт.
ХОСОНТЫ Земфирæ.